Bloomberg: Avropada elektrik enerjisinin qiymətləri rekord həddə qalxıb

Bloomberg-in məlumatına görə, gələn il üçün Aİ-yə elektrik enerjisi təchizatı üzrə fyuçerslər avqustun 11-də yeni rekordlar müəyyənləşdirib.

Almaniyada elektrik enerjisinin tədarükü üzrə müqavilənin dəyəri birja ticarətinin nəticələrinə görə 6,6% artıb - 1 MVt/saat üçün 455 avroya qədər qalxıb. Fransada analoji fyuçers müqaviləsi gün ərzində 7,8% artaraq 1 MVt/saat üçün 622 avroya çatıb.

Avropa İttifaqında elektrik enerjisinin qiymətlərinin artması Rusiyadan tədarükün kəsilməsi, atom elektrik stansiyalarının istehsalının azalması, külək dəyirmanları və günəş panellərindən alınan enerjinin azlığı, həmçinin Avropada quraqlıq və yanğınlara səbəb olan istiliklə bağlıdır.

Avropa Enerji Tənzimləyiciləri Şurasının prezidenti Anneqret Qrebel Bloomberg-ə bildirib ki, "Rusiya qazı kəsərsə, bütün ehtiyacları ödəmək üçün kifayət qədər qaz olmaya bilər və o zaman qənaət tədbirləri tətbiq ediləcək".