Əsədin elan olunmamış Moskva səfəri – Kritik danışıqlar

Rusiya lideri, Suriyada keçirilən seçkilərin nəticələrinin xalqın Əsədə inamının yüksək olmasına işarə olduğunu qeyd edib.

Suriyanın Prezidenti Bəşər Əsəd gözlənilmədən Rusiyaya səfər edib. Sputnik Azərbaycan Rusiya KİV-nə istinadən xəbər verir ki, Kremldə Rusiya Prezidenti Vladimir Putin və Bəşər Əsəd arasında danışıqlar baş tutub.

"Sizi, yenidən Moskvada salamlamağa çox şadam. Öncə bu yaxınlarda olan ad gününüz münasibətilə sizi təbrik edirəm. Təbii ki, artıq şəxsi formatda – prezident seçkilərində çox yaxşı nəticə münasibətilə də təbrik edirəm", - deyə Rusiya Prezidenti bildirib.

Görüş zamanı Putin vurğulayıb ki, Suriya prezidenti siyasi opponentlərlə dialoq üçün çox şey edir. Rusiya prezidenti eyni zamanda Suriyada xarici qoşunlarının mövcudluğunu həll olunmayan problem adlandırıb. Putin birgə səylərlə Suriya xalqının "ayağa qalxmasına" yardım edəcəklərinə də ümid etdiyini bildirib.

Rusiya lideri, həmçinin Suriyada keçirilən seçkilərin nəticələrinin xalqın inamının yüksək olmasına işarə olduğunu qeyd edib. Öz növbəsində Suriya Prezidenti Putinə rus dilində təşəkkür edib.

Qeyd edək ki, Bəşər Əsəd bu ilin mayında Suriyada keçirilən prezident seçkilərində 95,1% səs toplayıb.